Познато кој предмет оди во рацете на Ленче Ристоска
Објавено во: Македонија 18 Септември, 2019
Обвинителката Ленче Ристоска ќе го застапува случајот „Талир 2“.
Овој предмет кај неа го прераспредели државниот јавен обвинител Љубомир Јовески.
Судењето за „Талир 2“ треба да започне утре откако претходното рочиште беше одложено поради отсуство на адвокатите на обвинетите. Во овој случај обвинети се екс премиерот Никола Груевски и поранешниот генерален секретар на Владата, Кирил Божиновски, кои, со злоупотреба на службената положба, овозможиле правното лице ДГ Бетон АД Скопје да го изгради седиштето на политичката партија ВМРО-ДПМНЕ.
И покрај тоа што за правното лице ДГ Бетон АД Скопје важеле ограничувањата од Законот за финансирање на политички партии, сепак обвинетите договориле несразмерна корист за политичката партија ВМРО-ДПМНЕ во однос на обврските кои ги имало правното лице ДГ Бетон АД Скопје.
Обвинетите стекнале значителна имотна корист за политичката партија ВМРО-ДПМНЕ во износ од 507.164.424,00 денари, односно 8.246.576 евра.
Откако ЈО ги презема предметите од СЈО, тие се прераспределуваат кај обвинители кои ќе ги застапуваат. „Монструм“ и понатаму ќе го застапуваат обвинителите Гаврил Бубевски и Фатиме Фетаи.