Пратениците изгласаа – нема по 100 евра месечно за стечајците!

Добивај вести на Viber

Ниту протестот на стечајците, ниту пак нивните жалби дека немаат за леб не ги спречија пратениците да го одбијат предложениот закон со кој се бараше овие граѓани да примаат по 6.000 денари до пензионирањето. Против законот попладнево гласаа 52 пратеници од ВМРО-ДПМНЕ и ДУИ. Опозицијата по гласањето, во знак на револт ја напушти салата откако останатите пратеници го одбија повикот да гласаат за предлогот и, како што посочија опозиционерите,  да покажат дека се грижат за граѓаните. Стечајците пак кои во поголем број се собраа пред Собранието, револтирани бидејќи на нивните преставници не им беше дозволено да влезат во Собрание, се судрија со полицијата во обид да го пробијат полицискиот кордон. Стечајниот лидер, Лилјана Георгиевска пак претходно најави дека ако не се донесе законот, ќе кампуваат пред Владата, пред Собранието, но и дека ќе протестираат пред домот на секој пратеник. Со паролите „Нож до коска“, тие бараа да прекин нивната голгота и да ги добијат 100-те евра месечно за да преживеат. Според пресметките, ако законот беше донесен, државата годишно ќе требаше да двои околу 7,5 милиони евра за 6.000 стечајци. Инаку предлог законот за стечајците опозицијата го поднесува веќе по петти пат.