Предупредувачки пораки до Италија, мора да се намали долгот

Добивај вести на Viber

Организацијата за економска соработка и развој (ОЕЦД) ја предупреди Италија да не ја игнорира политиката на буџетски заштеди, бидејќи ризикува да ја изгуби довербата на пазарите, јавува CNBC. Во својот годишен извештај за земјата ОЕЦД ја предупредува новата италијанска влада дека секоја промена во политиката на реформи може да наштети на обновата на земјата. „Италија спроведува силна кампања за обновување на фискалната стабилност и постигнување на долгорочен раст ... Со долгот тежок 130% од бруто домашниот производ (БДП) и тешката програма за сервисирање на овие долгови Италија останува подложна на евентуална промена на расположението на финансиските пазари ", се наведува во новиот извештај. „Затоа приоритет број еден на новата италијанска влада е да постигне значително и трајно намалување на јавниот долг", стои во извештајот на организацијата. ОЕЦД ја повикува извршната власт да ги контролира подобро трошоците, да се консолидираат веќе воведените реформи и да отпочне со нови, ако сака да го стимулира растот и продуктивноста - слабите точки на Италија. Првата препорака е да се надмине трендот на зголемување на долгот во однос на БДП, што според ОЕЦД е можно преку балансиран буџет или мал буџетски суфицит, потпомогнат од цврсто спроведување на реформите кои го помагаат растот. ОЕЦД очекува италијанската економија ќе се намали за 1,5% во текот на оваа година, но ќе расте за 0,5% од 2014 година, а буџетскиот дефицит на земјата ќе достигне 3,3% во 2013 година и 3,8%  во годината потоа.