Предупредување: Владите ќе згрешат ако го забранат биткоинот
Објавено во: Финансии 27 Декември, 2017
Шила Беир, поранешната директорка на Федералната корпорација за осигурување на депозитите на САД, порачува дека владите не треба да го забранат биткоинот како криптовалута, туку само да одредат степен на регулација и правила на пазарите со цел да не се предизвика поголем шок и штети за тие што веќе инвестирале многу пари.
Според Беир, која сега работи како финансиски советник на повеќе корпорации, биткоинот добива на вредност бидејќи корисниците имаат доверба во технологијата која го генерира, а не во владите каде во повеќе држави има политички кризи или несиугурни финансиски системи.
Кога блокчејн технологијата ќе започне да се применува во се повеќе трговски области, во различни трансакции на пазарот и реалната економија тогаш ќе се види вистинската вредност на биткоинот бидејќи тој сега е само идеја и алатка која се користи пред се на темните ќошиња на интернетот каде нема регулации или е потешко да стигне раката на законот и органите на прогонот.
Затоа Беир вели дека е потребна регулација, односно ако веќе се тргува на големите берзи како на пример Меркантилната берза во Чикаго, тогаш ќе се создадат услови за контрола, надзор и креирање механизми за осигурување на самите инвеститорите преку проверки на исплатливоста, изворот на средства, самиот пласман, односно ќе се создаде идентично тргување како и со сите добро регулирани хартии од вредност или вредни стоки и предмети.
Биткоинот, сепак е меур, смета Беир бидејќи за една година нарасна за неверојатни 2000% и кога тогаш може да експлодира при што многумина ќе загубат многу пари. Затоа Беир вели инвеститорите најпрво добро да се информираат, да откријат се што треба да знаат за да ги осигураат вложените пари и да знаат кога да ги употребат стекнатите токени за биткоин.
Исто така вели дека не треба да се презема огромен коцкарски ризик со биткоинот, туку да се почека пазарна стабилизација бидејќи цените како што брзо скокаат, така и брзо паѓаат.
Автор: Христијан Станоевиќ