ПРЕДУПРЕДУВАЊЕ ЗА МЕГА-ЗЕМЈОТРЕС: Има 70 до 80 отсто шанси да се случи во Јапонија

Добивај вести на Viber

Јапонија за првпат издаде предупредување за зголемен ризик од силен земјотрес во блиска иднина.

Предупредувањето е издадено синоќа и ги повикува луѓето да бидат внимателни, но да не се евакуираат. Исто така, беше истакнато дека предупредувањето не значи дека е неизбежен голем земјотрес, туку дека е поверојатно од вообичаено да се случи.

Предупредувањето е само неколку часа по земјотресот со интензитет од 7,1 степени според Рихтеровата скала што го погоди јужниот остров Кјушу, но не предизвика големи штети.

Но, експертите се во состојба на зголемена готовност поради локацијата на епицентарот, на работ на пукнатината Нанкаи, област на сеизмичка активност што се протега долж јапонскиот брег на Тихиот Океан.

Претходните земјотреси од пукнатината Нанкаи оставија илјадници мртви. Овие „мегаземјотреси“ се забележуваат на секои 90 до 200 години, последниот се случил во 1946 година.

Експертите велат дека има 70 до 80 отсто шанси за земјотрес со јачина од 8 или 9 степени според Рихтеровата скала некаде покрај јазот во следните 30 години, јавија јапонските медиуми.

Проценките за најлош случај покажуваат дека повеќе од 200.000 луѓе би можеле да загинат во земјотресот и можното цунами што ќе следи.

Тоа предупредување ќе важи една недела.

Се замолуваат жителите да бидат во состојба на подготвеност во наредните денови. Официјалните лица, исто така, им порачаа на луѓето да бидат претпазливи, но да продолжат со секојдневниот живот. Тие ги советуваа жителите да ги проверат патиштата за евакуација каде што е потребно и да се осигураат дека нивните домаќинства имаат доволно резерви.

Фото: Пиксабеј