Преку „Отворени денови“ земјоделците ќе се информираат за можноста за финансиска поддршка

Добивај вести на Viber

Со зачестени посети на општините низ земјава, кои стартуваат од утре, надлежните со земјоделците ќе дискутираат за програмите за финансиска поддршка и за можностите кои се нудат преку нив. Проектот се вика  „Отворени денови на агенциите за финансиска поддршка во земјоделството и руралниот развој, за храна и ветеринарство и за поттикнување на развојот на земјоделството“, а ќе трае до крајот на февруари идната година. Според директорот на Агенцијата за финансиска поддршка на земјоделството и руралниот развој Тони Димовски, овој проектот е резултат на соработката со земјоделците во изминатиот период и со бизнис секторот. На овој начин, вели тој, ќе бидат споделени искуства и ќе се чујат сугестии во која насока да се продолжи. „Новитет е поголемото прусуство на Агенцијата за финансиска поддршка во земјоделството на теренот. Во овој период ќе бидат отворени осум регионални центри на Агенцијата за финансиска поддршка во земјоделството и руралниот развој во осумте плански региони“, рече Димовски. За Дејан Рунтевски, директор на Агенцијата за храна и ветеринарство, средбите се одлична можност за запознавање и идна соработка. „Успеавме во минатото да го подигнеме нивото на свеста и знаењето на потрошувачите, како и за нивното право за безбедна и квалитетна храна. Се покажа дека средбите и комуникацијата што ја имавме во минатиот период се доста значајни и корисни за граѓаните, земјоделците и за Агенцијата за храна и ветеринарство“, рече Рунтевски кој истакна дека добиле повеќе информации и податоци за тоа како да се подобри имплементацијата на законската регулатива и да се решат одредени проблеми.