Претседателот Иванов ги „испердаши“ Euronews за провокацијата со FYROM

Добивај вести на Viber

Македонскиот претседател Иванов одбил да даде интервју за каналот Euronews бидејќи два дена била користена кратенката FYROM во најавата која се вртела на социјалните мрежи. Неговиот кабинет упатил забелешка до Euronews да не ја користат кратенката во таа форма бидејќи тоа е навредливо за Македонија и македонскиот народ и дека претседателот нема да даде интервју под такви услови иако претходно имале договор. 

„Ве известуваме дека македонскиот претседател Иванов го откажува закажаното интервју за Вашиот медиум. Крајно неприфатлива е Вашата употреба на кратенката FYROM во ословувањето на нашата земја, Република Македонија.

Длабоко жалиме што, и покрај покажаната добра волја за соработка од наша страна, не беше прифатено барањето за отстранување на кратенката FYROM при промоцијата на интервјуто на социјалните мрежи, и не беше уважено барањето да се придржувате до уставното име на нашата земја, Република Македонија и до придавките изведени од уставното име на нашата земја – Република Македонија.

Сметаме дека употребата на кратенката FYROM е директна навреда за граѓаните на Република Македонија. Таа кратенка, како што претходно ви укажавме, никаде не се употребува, вклучувајќи го и регистерот на ОН и ви посочивме дека FYROM не е име во ОН, туку референца која никогаш не се користи како кратенка.

Сметавме дека 2 дена се повеќе од доволно разумен рок да ја исправите Вашата груба грешка и како што побаравме, во најмала рака да испратите извинување до граѓаните на Република Македонија.

Ви изразуваме благодарност за искажаниот интерес за интервју со македонскиот претседател Иванов, кое поради наведените причини, нема да го реализираме.“ – стои во писмото кое Кабинетот на Иванов го испратил до EuroNews.