ПРИТВОР ОД 30 ДЕНА ДОБИ САРАМАКОВ - полицискиот службеник, кој бил обезбедување и на Мицкоски е во Шутка

Добивај вести на Viber

Полицаецот од Шестата управа во Министерството за внатрешни работи, Ангел Сарамаков, кој бил и дел од обезбедувањето на премиерот Христијан Мицкоски веќе е во притвор во КУП Затвор Скопје, потврди директорот на установата, Бобан Утковски.

Скопскиот кривичен суд му одреди 30 дневен притвор на Ангел Сарамаков, кој е осомничен за кривично дело „оддавање службена тајна“.

МВР вчера соопшти дека на 30 март по претходно добиени сознанија за сторено кривично дело „оддавање службена тајна“ по член 360 од Кривичниот законик, од страна на полициски службеници од Одделот за внатрешна контрола, криминалистички истраги и професионални стандарди во координација со ОЈО ГОКК спроведена е координирана полициска акција и реализирани се истражни дејствија за претрес на дом, возила и лица на подрачјето на СВР Велес.

- При спроведувањето на полициската акција и преземените мерки и активности, на паркинг просторот пред хотел во Велес, во возило “бмв” затекнати се А.С., полициски службеник во Одделот за заштита на определени личности и објекти и Б.К., а при извршен претрес во возилото пронајден е ранец со службени материјали од МВР и од лицата се одземени мобилни телефони, по што се лишени од слобода - наведоа од МВР.

Во рамки на акцијата, дополнително биле извршени претреси на повеќе локации, при што биле пронајдени и одземени електронски уреди, службени документи и други предмети релевантни за истрагата. Исто така, од преземените мерки и активности во процесот на проверка, ОВККИПС констатирал дека полицискиот службеник постапувал спротивно на законските и подзаконските акти на Министерството за внатрешни работи, со што истиот неовластено поседувал службени материјали,  нивно  откривање на трети лица надвор од министерството, а со кои дејствија го извршил кривичното дело по член 360 од КЗ.

- Од страна на ОВККИПС до ОЈО ГОКК на 31.03.2025 година ќе биде поднесена кривична пријава против А. С., за кривично дело „оддавање службена тајна“ по член 360 од Кривичниот законик, соопшти вчера МВР.

По апсењето, од владата посочија дека истрагата треба да утврди што се случило и дека безбедноста на премиерот не е загрозена.

Денеска со реакција за аспењето на Сарамаков се огласија и од опозициската СДСМ обвинија дека обезбедувањето на премиерот Мицкоски е полно со криминалци. Но од ВМРО-ДПМНЕ возвратија дека сега се апсат сите кои се поврзани со кривични дела, за разлика од минатото кога тоа не се правело. 

Потврда дека осомничениот добил 30 дена притвор пристигна и од Обвинителството. 

- Јавен обвинител од Специјализираното одделение за гонење на кривични дела сторени од лица со полициски овластувања и припадници на затворска полиција при ОЈО ГОКК донесе Наредба за спроведување на истражна постапка против самостоен инспектор припадник на Единицата за лично обезбедување на Претседателот на Владата на РСМ, осомничен дека од користољубие сторил кривично дело Оддавање службена тајна.

Осомничениот како службено лице, вечерта на 30.3.2025 година на паркинг просторот пред хотел во Велес се сретнал со неповикано лице – сведок во постапката и му покажал службени документи на МВР, што претставуваат службена тајна. Притоа му дозволил на сведокот истите да ги снима, кажувајќи му кој документ за што се однесува. На овој начин, осомничениот од користољубие, а со цел да бидат објавени на социјалните мрежи, сторил достапни службени документи што претставуваат службена тајна, со цел да прибави паричен износ од 50.000 евра од лицето за кое се однесувале документите - се посочува во соопштението на обвинителството. 

Дополнуваат дека соглсано околностите јавниот обвинител утврди дека се исполнети условите, па на судијата на претходна постапка при Основен кривичен суд Скопје му предложи на осомничениот да му определи мерка притвор во траење од 30 дена, кој предлог беше прифатен од судот.

Додаваат дека за ова кривично дело предвидено и казниво по член 360 од КЗ е предвидена затворска казна од најмалку една година.

Воедно од Основното јавно обвинителство за гонење на организиран криминал и корупција укажува дека ниту лицата, ниту документите во овој предмет, не се поврзани со лицата и групата од Грчец, како што во текот на вчерашниот и денешниот ден објавија дел од медиумите.