Продолжен рокот за ИПАРД, пари има – нема кој да ги земе?

Добивај вести на Viber

Иако денеска требаше да биде затворен, до 30 септември земјоделците ќе може да аплицираат со проекти за парите од ИПАРД програмата. Како што информираат од  Агенцијата за финансиска подршка во земјоделството и руралниот развој , ова е сторено за да се помогне на заинтересираните во подготовка на апликациите. Годинава, земјоделците имаат на  располагање околу 40 милиони евра,  средства наменети за инвестиции на земјоделски стопанства за нивно преструктуирање и надградба за достигнување на стандардите на Европската унија, инвестиции за преработка и маркетинг на земјоделските и рибните производи со нивно преструктуирање и надградба за достигнување ЕУ стандардите , како и за диверзификација и развој на руралните економски активности. Новина во овој,  осми оглас е можноста да се аплицира и за земјоделска механизација за која исто така половина од средствата се неповратна помош финсирана од европските пред пристапни фондови. Од над 100 милиони евра кои се на располагање од ИПАРД програмата од 2009 година, досега се искористени помалку од 8 милиони евра. Потребната документација за подготовка и поднесување барања и упатства за корисниците на ИПАРД, може да се преземат од интернет страницата на Агенцијата и лично, во приемницата на Агенцијата и во нејзините најблиски регионални центри или работни единици, секој работен ден.