Проф.д-р Јасмина Делчева-Диздаревиќ: Образовна политика наместо политика во образованието

Добивај вести на Viber

Видеото на кое директорот на прилепската  гимназија “Мирче Ацев” ги повикува учениците да излезат на протест на иницијативата „За заедничка Македонија“ предизвика бура од реакции на социјалните мрежи и во јавноста.  Во услови на моменталната политичка криза која е вештачки создадена од една партија што ја губи моќта и не бира средства и начини како да го одбрани својот криминал, не сум воопшто изненадена од вакви непедагошки испади, вели за Фактор професорката  Јасмина Делчева- Диздаревиќ од Институт за педагогија при  Филозофскиот  факултет.

Особено загрижувачки според неа е што директорот на училиштето, надвор од службените овластувања, држи политички говор и ги повикува учениците на протест за наводна одбрана на македонскиот јазик и унитарноста на државата.Па наместо да биде позитивен пример за градење на соживот  и единство помеѓу учениците, тој ги подгрева националните страсти  кои лесно може да доведат до разгорување на национална и етничка нетрпеливост во поголеми размери.

“Барањата да се сочува унитарноста на државата од измислен непријател и обидот од врвот на партијата да влијае на своите пулени кои со нивна помош се дојдени до некоја  си позиција во образовни институции, а тие, пак,  со желба да им се одолжат на некој начин не водат грижа за нивнте дејанија и изјави, не водат грижа кому се обраќаат и какви последици ќе предизвикаат, а се со една и едиствена цел, да  ја дефокусираат јавноста од реалните случувања.Во конкретниов случај, кога директор на едно училиште врши  агитирање на малолетни ученици е недозволиво, срамно и казниво со закон, затоа што училиштето во својата суштина има само една функција, а таа е воспитана и образовна”- потенцира професорката Делчева- Диздаревиќ.

Злоупотребата на учениците од средните училишта за политички цели за наводна одбрана на државните и националните интереси според неа треба најостро да се осуди и да се санкционира.

“Сведоци сме дека ова не е прв случај, но апелирам до надлежните институции веднаш да реагираат и да ги санкционираат истите, затоа што популацијата на која им се обраќаат е многу специфична. Имено, во воспитно- образовните институции се изнесуваат факти засновани на научни достигнувања, а на учениците воспитно се влијае прво со личен пример, а потоа  и со градење на личности кои ќе бидат оспособени да размислуваат сами и да имаат сопствени и лични ставови. Наша должност како педагози е  да ги научиме учениците да дебатираат, да научат да го почитуваат соговорникот и со аргументи да го бранат својот став”- додава професорката по педагогија.

Ваквите испади од страна на просветните работници насочени директно кон учениците во најмала рака  вели ги деградирадираат и понижуваат истите, а се со една и единствена цел,  да создадат послушни и покорни граѓани, за жал со трајни последици, кои понатаму многу тешко, а дури и никогаш не ќе можат да се поправат –порачува професорката Делчева-Диздаревиќ.

Директорот на прилепската гимназија Кирил НИколовски  го потврди разговорот кој бил снимен од ученици кои се спротивставиле на неговото агитирање. Вели тоа е негов личен и професионален став во и надвор од училиштето и тој само разговарал со нив, а не вршел притисок или агитација. Осуда за  злоупотреба на учениците од средните училишта за политички цели стигна од Хелсиншкиот Комитет за човекови права кој ќе поднесе претставки до Државниот просветен инспекторат и Народниот правобранител. Министерството за образование и наука најави дека ќе побара Државниот просветен инспекторат  да утврди  пречекорувања на службените овластувања и повреда на Законот за средно образование, со цел да утврдат незаконито постапување на страната на директорот на средното училиште Мирче Ацев од Прилеп и да иницираат соодветни постапки за негово санкционирање.

С.Б.