Добивај вести на Viber
Откако по седумдневна блокада, професорската фела алармираше дека Владата не ја исплаќа октомвриската плата, денеска на трансакциските сметки легнаа парите. Некому подоцна, некому порано, но се очекува заклучно со крајот на денешниот ден професорите, интелектуалната сила на оваа земја, конечно да си ја добијат заслужената плата. Откако за прв пат се случи, да доцнат платите на универзитетите многумина го покренаа прашањето што се случува со буџетот. Прв проговори универзитетскиот прфесор Јове Кекеновски, кој неколку дена, преку својот ФБ профил бараше одговор зошто платата не се исплаќа, но и одговорност од Министерот за образование Панче Кралев и од ректорот на државниот униерзитет.
“Денес е 22 ноември, на универзитетот ,,св.Климент охридски" и најверојатно и на останатите државни универзитети сеуште нема плата. Во сериозна и демократска држава за ова следува одговорност.
П.С. почитувани колеги не се кријте и немојте да ми телефонирате и да ми кажувате ,,браво", туку дигнете го својот глас и побарајте одговорност! – напиша професорот Кекеновски.
Во меѓувреме, и дел од останатите професори побараа одговор за застојот.
„По законот сите буџетски институции, па и приватните се обврзани платата да ја исплатат до 15 ти во месецот, меѓутоа денес е 22 ри, а ние сеуште немаме примено плати и други надоместоци кои универзитетот е обврзан да ги исплати. Тука се вбројуваат доплнителните активности за поголем фонд на часови, учество во магистерски комисии, во комисии за одбрана на докторски дисертации, рецензии на учебници. Варијабилата обично се исплаќа после месец дена , меѓутоа за некои надоместоци нема исплата повеќе од 3 месеци, вели професорот Зоран Киткањ.
Дел од останатите професори се заканија со штрајк. Во професорските кругови се лиферуваа две верзии. Според првата, проблемот е во ликвидноста на буџетот, и во неможноста да се обезбедат пари за исплата на платаи. Според втората верзија, се работи за “суптилен“ притисок врз државните универзитети, сами да си ги подмируваат сметките за парно греење. Имено, откако универзитетите одбиле од својот фонд да ги плаќаат сметките, Владата направила потег со кој предизвикала застој во навремената исплата на платите, за да им покаже на професорите дека ги држи в рака.
„Колегите укажуваат на тоа дека по секоја цена министерството и владата настојува трошоците за парното греење да ги сноси образовната институција. Ако сме ние државен факултет тогаш тоа треба последователно да оди и кај другите буџетски институции, значи и кај училиштата и здравствените институции, тука се и социјалните институции, па да видиме кај ќе биде крајот“, велат професорите.
Според информациите, и на синоќа одржаните совети на дел од факултетите главна тема била исплата на платите е стравувањето дали тоа ќе стане пракса. Освен проблем со платите, дел од професорите на своите ФБ профили се пожалија дека во одредени високо образовни и научни институции немало парно греење. Сепак, на факултетите денеска ќе биде потопло, оти и паричниците ќе бидат подебели. Ректоратот на универзитетот „Св. Кирил и Методиј“, заканата за штрајк ја оцени како несериозна, бидејќи велат, платата доцни само неколку дена.
Инаку, професорските плати се финасираат комбинирано. Од 60% до 70% се исплаќаат преку буџет додека остатокот се финансира од парите на самите факултети. Според информациите, сите налози за исплата на плати до Министерството за финасии овој месец биле поднесени навреме, но потписот изостанал до доцна вчера.
С.Ј.