Путин бара Киев да ги запре воените операции

Добивај вести на Viber

Рускиот претседател Владимир Путин рекол дека Киев мора да ја запре својата воена операција на истокот од Украина и да престане да врши економски притисок на регионите кои ги држат проруските сили. Тие региони, предупредува Путин се наоѓаат на „патот без излез пропратен со катастрофа“.

Путин истакнал дека најважниот услов за стабилизирање на состојбата е „итно воспоставување на примиријето и завршување на таканаречената антитерористичка, но всушност казнена операција на југоистокот од Украина“, пренесува Танјуг.

„Обидот на Киев да изврши економски притисок врз Донбас и нарушувањето на секојдневниот живот само ја влошуваат состојбата. Тоа е пат без враќање следен со голема катастрофа“, истакнал рускиот претседател во интервју за египетскиот државен весник Ахрам, пред посетата на Каиро.

Тој во тоа интервју го повторил ставот на Москва дека насилството на истокот од Украина претставува реакција на „државен удар“ во кој, со помош на Западот, демонстрантите минатата година го собориле од власт претседателот Виктор Јанукович.

„Ултранационалистите кои ја преземаа власта со помош на воена сила ја доведоа земјата на работ на пропаст и започнаа братубиствена војна“, истакнал Путин.

Заменикот на шефот на руската дипломатија Григориј Карасин, ќе отпатува во понеделникот во Берлин, а претставници на Русија, Украина, проруските сили и ОБСЕ ќе се состанат во вторникот во Минск, пред самитот во тој град наредниот ден.

Путин рекол дека самитот во среда ќе биде одржан „ако до тогаш успеат да ги усогласат нивните ставови“, пренесува Ројтерс.