РАБОТА ОД ДОМА ПРЕД ПАНДЕМИЈАТА: Кој и каде најчесто работи на овој начин?

Добивај вести на Viber

Во 2019 година, 5,4 oтсто од вработените луѓе во Европската унија (ЕУ) кои биле на возраст од 15-64 години изјавиле дека работат од дома, покажуваат податоците на Евростат.

Сега поради пандемијата на коронавирусот, луѓето се принудени да работат на овој начин, но бројките се однесуваат за периодот пред тоа.

Жените почесто работат од дома, за разлика од мажите.

По возрасни групи, 6,6 отсто од оние на возраст меѓу 50-64 години обично работеле од дома, исто како и 5,2 отсто од лицата на возраст меѓу 25-49 години.

Само 2,1 отсто од помладите луѓе, на возраст меѓу 15-24 години, изјавиле дека  работат од дома.

Холандија и Финска се најдоа на врвот на листата на земји членки на ЕУ кои се лидери со работа од дома, со 14,1 отсто од вработените лица кои  работеле од дома во 2019 година.

По нив следуваат Луксембург и Австрија каде 11,6 и 9,9 отсто,  работеле од дома.

Зад нив се Данска, Ирска, Франција, Белгија, Естонија, а потоа следи Словенија.

Во Германија нешто повеќе од 5 отсто од луѓето работат онлајн.

Во Швајцарија помалку од 4 отсто работниците ги обавуваат обврските од дома.

Во Македонија поради ширење на коронавирусот на фирмите им беше препорачано доколку можат да работат од дома. Сепак, не се знае колку работници вообичено работат од дома.

„Кај нас сѐ почесто има огласи во кои се нуди работа од дома. Има луѓе кои пробале, има луѓето кои се задоволни или не се, како и во секоја друга работа. Ние сме социјални битија, и луѓето сакаат да одат на работа и да бидат дел од тој работен процес, но оние кои се на периферија повеќе им одговара да работат онлајн“, вели Донка Спасовска, сопственичка на агенцијата за посредување при вработување „Хоризонт“.

На стариот континент, најниски стапки на вакво работење се забележани во Бугарија (0,5 отсто), Романија (0,8 отсто), Унгарија (1,2 отсто), Кипар (1,3 отсто), Хрватска и Грција со 1.9 отсто.