Работник од Кина загина на работно место во Кавадарци

Добивај вести на Viber

МВР објави дека работник ангажиран од Кина загина на работно место во фабрика во Кавадарци во несреќен случај.

- На 10.09.2025 во 12:10 часот во ОВР Кавадарци е пријавено дека Г.Х.(38) од Кина, додека извршувал работни задачи во фабрика во Кавадарци, бил удрен од кран и од здобиените повреди починал на местото, информира полицијата.

Лекар од Итна медицинска помош Кавадарци констатирал смрт, а увид на местото извршил јавен обвинител во содејство со увидна екипа од ОВР Кавадарци.

По наредба на јавен обвинител телото на починатиот било дадено на обдукција .

Од Обвинителството соопштија дека загинатиот е 38-годишен кинески државјанин кој во Македонија пристигнал на крајот на август, а од таму изразуваат сомневање дека неговиот работен однос уште не бил регулиран.

„Според првичните сознанија, тој пристигнал во земјава кон крајот на август, но постојат сомненија дека иако се уште не му бил регулиран престојот и работниот однос, сепак веќе бил ангажиран на извршување работни задачи во фабриката. Притоа, бил притиснат од кран на висока платформа и му биле нанесени тешки телесни повреди од кои починал.

Јавниот обвинител издаде повеќе наредби со цел да испита евентуални тешки дела против општата сигурност. Издадена е наредба за обдукција на телото на починатиот, прибавена е целокупната документација за изведувањето на работите, а ќе се врши машинско вештачење на кранот и испитување на почитувањето на прописите од областа на заштитата при работа“, соопшти ОЈО.