Распродадени билетите за македонската премиера на контроверзниот филм „Ругањето со Христос“

Добивај вести на Viber

Билетите на македонската премиера на домашната филмска драма „Ругањето со Христос“ се распродадени, потврдија денеска од кино „Милениум“.

Премиерната проекција е закажана за денеска во 20.00 часот во третиот ден од рамките на фестивалот „Киненова“. Не е познато дали филмот ќе се прикажува на редовен репертоар. Цената за билет е мошне популарна и изнесува само 100 денари.

- Билети во моментов не може да се набават, единствено доколку има откажувања на неколку часа пред премиерата - ни изјавија од кино „Милениум“.

Режисерот Јани Бојаџи, чиј филм е продуциран со финансиска помош одобрена од претходната власт, претходно се закануваше дека ќе ги откаже изведбите на сите фестивали, откако Министерството за култура го оценби овој филм како контроверзен со осетливи политички теми за македонската јавност.

Претпладнето излезе вест на еден портал дека полицијата од утринава врши претрес во домот на Јани Бојаџи, најверојатно поради преголема желба да се критикува власта, но режисерот ја демантираше веста.

Пред два дена Бојаџи на својот Фејсбук профил објави за притисокот од власта и обидите за цензура преку забрана на кино салите да го прикажуваат филмот.