Расте клубот поддржувачи на Гаспром во Европа

Добивај вести на Viber

Во Европа се формира нова коалиција сојузници на "Гаспром" - Грција, Турција, Македонија, Србија и Унгарија – се петте земји кои официјално ја поддржуваат изградбата на "Турски поток". Тоа го пишува во својот коментар руското издание "Коммерсант". Според информација на медиумите во најскоро време кон овој клуб ќе се приклучи и Австрија. Неделава во унгарската престолнина се одржа состанок на министрите за надворешни работи на петте земји, на која беа разгледани енергетските прашања, меѓу кои и подготвеноста за изградба на "Турски поток". Бугарија веќе не е во игра. По проблемот кој го предивика претходно соседот од истокот не беше поканет на овој форум. Според информациите на "Коммерсант" на разговорите во Будимпешта сепак имало претставник на Европската комисија како набљудувач на разговорите. По средбата е потпишана изјава за енергетска соработка и создавање на "економски оправдани патишта за диверзификација на правците и изворите" за транспорт на природен гас од Турција за земјите од Европа. На овој начин петте земји ја потврдиле својата желба да го поддржат проектот, кој ќе поминува под Црното Море, преку територијата на Турција и до гасниот центар Баумгартен, толкува "Коммерсант". Проектот, го носи името "Турски поток", и е алтернативата на "Јужен поток". Од Министерството за надворешни работи на Унгарија прецизираат дека ќе биде формирана работна група која ќе биде одговорна за развојот на гасната инфраструктура, а средбите на претставниците на петте држави ќе станат редовни. Руското издание додава дека ако овие држави се договорат за "земниот" пат на "Турски поток", "Газпром" ќе може да го реши прашањето за испорака на природен гас во Европа, заобиколувајќи ја Украина. Клучен проблем сепак ќе се појави при финансирањето на новиот проект. Со "Јужен поток" логиката беше дека "Газпром" привлекува средства, го гради гасоводот и е сопственик на објектите. Во услови на западните санкции сепак на руската компанија ќе и биде тешко да ги најде потребните средства, а и повторно ќе се соочи со европското законодавство, истата компанија да е истовремено сопственик на енергетската мрежа и давателот на неа. К.К.