Добивај вести на Viber
Да се интензивира соработката меѓу Македонија и Унгарија, пред се во делот на сточарството и производството на зеленчук, се договорија денеска унгарскиот министер за рурален развој, Шандор Фазекаш и македонскиот министер за земјоделство, Љупчо Димовски.
Според Димовски во фокусот на соработката е интензивирањето на размената, но и како што вели тој, за нас важните унгарските искуства за евроинтеграцискиот процес.
Двајцата министри се договориле дека биотехнологијата и заштитата на животната средина се два сегменти во коишто треба да се развива идната соработка, а со цел понатамошно продлабочување на односите беше потпишан и заеднички меморандум за соработка во земјоделството.
„Унгарија ги поддржува евроатланските аспирации на Македонија, но дојде време да ја интензивираме и соработката во областа на земјоделството“, изјави министерот Фазекаш кој исто така најави дека е отварена можноста македонски експерти да се дообразуваат на унгарскиот универзитет.
Македонија годишно од Унгарија увезува земјоделски производи во вредност од 6 милиони евра, пред се житарици и месни производи. Македонскиот извоз во Унгарија е двојно помал, 3 милиони евра годишно, а најмногу се извезува зеленчук и вино.