РЕФЕРЕНДУМОТ ЗА ДОГОВОРОТ СО БУГАРИЈА БИ СЕ ОДРЖАЛ НАПРОЛЕТ, А ИДЕАЛНО БИ БИЛО ЗАЕДНО СО ИЗБОРИТЕ - Мицкоски вели дека тој договор е „дрвото на отровот“

Добивај вести на Viber

Договорот со Бугарија е всушност „дрвото на отровот“, и тој треба да се напушти и да се пресече, смета лидерот на ВМРО-ДПМНЕ Христијан Мицкоски. 

Тој денеска на брифинг со новинарите беше дециден дека се додека не се напушти Договорот со Бугарија, ВМРО-ДПМНЕ нема да поддржи уставни измени.

Лидерот на ВМРО-ДПМНЕ вели дека неговата партија не е против тоа Бугарите да влезат во Уставот како дел од народ, но вели дека ако тие ги поддржат уставните измени, ќе продолжи уценувачката политика на Бугарија кон земјава, а која произлегува од Договорот од 2017 година, кој, како што рече, е асимилаторски и треба да се напушти. 

„Немаме ништо против Бугарите да бидат дел од Уставот, но, со што Бугарија покажа дека е добар сосед“, нагласи тој, потенцирајќуи дека Бугарите упорно тврдат дека „не постои македонскиот јазик и Македонците“.

Со оглед што Договорот за пријателство датира од 2017 година, Мицкоски беше прашан и зошто референдум за тој договор не се барал тогаш, на што лидерот на ВМРО-ДПМНЕ одговори дека сега тој Договор, кој е отровно дрво, почнал да ги дава своите отровни плодови. 

Мицкоски смета дека не се сериозни прашањата од типот зошто неговите пратеници не ги поддржат уставните измени, ако, како што вели, нема проблем Бугарите да бидат дел од Уставот, и во услови кога на тој начин би ги разбиле аргументите на сите кои велат дека тие „не се европска партија“.

Инаку, како што е познато, ВМРО-ДПМНЕ синоќа го објави референдумското прашање „Дали сте за напуштање на важноста на Законот за ратификација на Договорот за пријателство, добрососедство и соработка меѓу Република Македонија и Република Бугарија“. 

Мицкоски информираше дека потписите ќе почнат да се собираат утре напладне, а први на листите ќе бидат потпишани пратениците од ВМРО ДПМНЕ. За да се одржи референдум треба да се соберат 150.000 потписи и да помине собраниската процедура.

Мицкоски не очекува власта да прави опструкции во Собранието, и очекува дека во законодавниот дом ќе помине иницијативата за референдумско изјаснување. 

Според лидерот на ВМРО-ДПМНЕ, само референдум со 910.000 гласа „за“ ќе се смета за успешен, но ја спомена и бројката од 600 до 700 илјади граѓани кои доколку се изјаснат против договорот, тоа би била доволно изразена воља на граѓаните. 

Инаку, со сите потребни процедури, како што рече Мицкоски, референдумот би се одржал некаде напролет, а на забелешката од новинарите дека тогаш треба да има ибори, рече дека „би било идеално референдумот да се организира на исти ден со изборите“.

Мицкоски смета дека во земјава треба да настане едно семакедонско обединување против Договорот за пријателство со Бугарија, и така ќе му се кажело „не“ на антимакедонскиот СДСМ.

Новинарите имаа забелешка дека не може да се прогласат за антимакедонски настроени сите партии и граѓани кои сметаат дека треба да се продолжи сегашниот модел на патот кон ЕУ, и оние кои сметаат дека можеби е подобро да се поддржат уставните измени, и затоа му сугерираа дека ВМРО-ДПМНЕ не би смееле да ја водат кампањата на обвинување за „антимакедонство“. Мицкоски на ова рече дека ќе го земе предвид ваквото размислување. 

А, за да успее референдумот, лидерот на ВМРО-ДПМНЕ тој апелира и бара поддршка за македонскиот народ од нивните соседи Албанци, Роми, Турци…

„Ова е најголемиот тест за македонскиот народ во поновата историја“, рече тој.

Мицкоски го повтори ставот дека со Договорот за пријателство со Бугарија е нападнат македонскиот идентитет и дека нашиот напредок во преговорите со ЕУ ќе зависи од преговорите на историската комисија.

Инаку, доколку референдумот успее, Мицкоски смета дека следната процедура треба да биде нашето МНР да ја извести Бугарија дека го напуштаме Договорот, а посчле една година би престанале за нас правните дејствија од тој Договор. Дека тоа може да се изведе, го увериле многу експерти и професори по меѓународно право. 

А, тој потоа не ја исклучува можноста земјава повторно да седне и да преговара со Бугарија за склучување на нов договор, кој нема да се темели на асимилаторска политика од бугарска страна како што се прави со сегашниот договор. Но, нема прецизно објаснување како тоа би се извело, имајќи ги предвид добро познатите ставови на сите бугарски политичари. 

Нина Нинеска-Фиданоска