Реформите во Велика Британија, засега без резултат

Добивај вести на Viber

Кога минатото лето на САД им го намалија кредитниот рејтинг, реакцијата на пазарите делуваше како да се руши светот. Од тој ден до денеска помина повеќе од половина година и ситуацијата таму не изгледа воопшто лошо. Американските обврзници се со ултра низок принос, додека берзата се враќа на пост-кризното ниво. Заклучокот е дека и не е така страшно ако ви го намалат кредитниот рејтинг. Очигледно светот смета дека сеуште САД се кредибилни позајмувачи, а богами и потрошувачи, па токму поради тоа пари од ширум светот се слеваат во американските обврзници. Неодамна на една друга голема економска сила – Велика Британија и беше намален кредитниот рејтинг. Примерот од САД покажува дека тоа само по себе не треба да загрижува, но сепак ова намалување на кредитниот рејтинг беше причина да се обрне малку повеќе внимание на оваа огромна економија која е дел од ЕУ, но е надвор од еврозоната. Во Велика Британија, премиер е Дејвид Камерон и на власт се две партии, што би рекло има коалициона влада. Оваа практика е исклучително ретка на островот. Оваа коалициона влада реши да се бори со кризата преку кратење на трошоците и зголемување на даноците. Овие работи беа поставени како приоритет за коалиционата влада. Моќниот министер за финансии дури и најави дека ваквата политика ќе трае до 2018 година. Сепак податоците кои доаѓаат од островот кажуваат дека политики не се спроведуваат баш на најдобар начин. Примарниот дефицит во буџетот изнесува 4,3% од БДП, што е доста високо ниво дури и ако споредиме со други земји во Унијата кои не спроведуваат така тешки мерки на штедење. Друга пострашна работа е тоа што и покрај падот на вредноста на фунтата спрема голем број на светски валути дефицитот на тековната сметка изнесува 3,1% од БДП. Ова веќе делува доста загрижувачки и покажува дека мерките не се такви како што треба да бидат или дека не даваат никаков резултат. И покрај сите реформи јавната потрошувачка расте, производството се намалува и како резултат на таквата ситуација, паѓа и продуктивноста. Периферните економии како Шпанија и Грција конечно почнуваат да бележат позитивни резултати на поле на продуктивноста, додека Британија постојано покажува влошени бројки. За 2012 Британците имаат 0% раст на БДП, додека за 2013 се предвидуваат скромни 0,9%. Намалената продуктивност е коренот на проблемите на оваа некогаш голема светска економска сила. Како што кажавме на почетокот намалувањето на кредитниот рејтинг на САД не предизвика продавање на обврзниците, но во Британија сега постои страв дали лошите фундаменти на економијата ќе ги потикнат инвеститорите на посилно продавање на британските обрвзници и на тој начин економијата да биде дополнително нарушена. Централната Банка реагира слично како ФЕД во САД и се надева дека конечно бројките ќе се променат на подобро, но засега минималниот раст е нешто на кое најмногу што може да се надеваат. Британија сепак нема преголеми отпуштања и има релативно ниска стапка на невработеност од 8%, доколку успеат со ваква политика да ја одржат би било одлично. Сепак проблемите не може долго време да се кријат под тепих. Редакција Фактор