Регионална соработка меѓу судиите кои работат во областа на правото на бегалците

Добивај вести на Viber

Академијата за судии и јавни обвинители во соработка и со финансиска поддршка на TAIEX инструментот за техничка помош и размена на информации при Европската Комисија организираше регионална конференција на тема „Азил и миграција“.

Учествуваа судии од Македонија, Албанија, БиХ, Хрватска, Косово, Црна Гора и Србија кои работат предмети од областа на правото на бегалците, како и претставници од правосудните академии, од Одделението за азил при македонското Министерство за внатрешни работи, Канцеларијата на Народниот правобранител и од Канцеларијата на УНХЦР во Скопје. Канцеларијата на TAIEX обезбеди присуство и на врвни предавачи.

Како што информира Академијата за судии и јавни обвинители, преку размена на искуства би се унапредиле знаењата на практичарите, но и на управните органи кои во прв степен решаваат во предметите за бегалското право и на барателите на азил, како и при решавањето на овие предмети да се применуваат најновите меѓународни стандарди.

Конференцијата е од исклучителна важност за проширување на меѓународната соработка на македонското управно судство со цел постигнување координација меѓу државите за подобрување на обуката од оваа област.

Ја отворија директорката на Академијата за судии и јавни обвинители Анета Арнаудовска, државниот секретар на Министерството за внатрешни работи Виолета Јанковска, како и претставник на Делегацијата на ЕУ во Македонија.

Презентирани се генералните аспкети на правото на бегалците на секоја од земјите учесници, а претставниците на правосудните академии презентираа обуки поврзани со правото на азил и миграција. Се идентификуваа најдобрите практики за судиите во контекст на правото на бегалците, празнините во праксата и заедничките потреби за зајакнување на капацитетите, како и зајакнувањето на регионалната судска соработка во областа на правото на бегалците и подобрување на обуките од оваа област.