Родот опаѓа, зрното се рони; Што се случува со кочанскиот ориз?

Добивај вести на Viber

Поради големата кршливост на оризовото зрно што годинава ги затече оризопроизводителите, приносот е преполовен и кои било мерки да се донесат, нема да ја надоместат загубата, се пожалија тие. Како што велат, состојбата дополнително ја отежнуваат и преработувачите со снижувањето на откупната цена, од 20 на 12 денари за килограм. „Се соочуваме со неочекуван проблем на кршливост на оризовото зрно за кој причините се непознати. Затоа бараме помош од сите институции кои се во можност да дадат насоки и совет. Претстојат консултации со науката која очекуваме да се произнесе и околу можноста кршливите зрна ориз да се искористат како сточна храна“, изјави министерот за земјоделство, шумарство и водостопанство Љупчо Димовски по состанокот.

Како што појаснија експертите, климатските услови како фактор се исклучени со оглед дека во околните земји со слични временски карактеристики, Грција, Италија, Турција, оризот не манифестирал кршливост.

Интересот за оризот опаѓа, вели претседателот на Самостојниот синдикат на земјоделски производители Ставре Јанев, кој побара мерки за заштита на производителите и порача дека во ваква година цената на оризот и покрај проблемите, треба да биде најмалку 18 или 19 денари за килограм. „Ако денес цената на арпата е 15 денари, а килограм семенски материјал е 85 денари, сами пресудете колкави се можностите за негова употреба. Но, доколку се утврди соодносот меѓу меркантилното и квалитетното семе, сигурно над 90 отсто од производителите ќе го користат“, посочи Јанев. На Македонија првпат и се случува проблем со кршливост на оризовото зрно. Од годинашниот принос на арпа кој достигна 24.000 тони, ќе се добијат најмногу 7.000 тони бел ориз што е преку третина од вообичаените 12.000 до 13.000 тони. Изминатите пет години површините под ориз се зголемени за 60 отсто, а вкупното производство на оризова арпа за 71 процент.