Рокот истече, заврши вонредната состојба во Македонија?

Добивај вести на Viber

Македонија синоќа на полноќ, барем информативно, се најде во мошне деликатна состојба, откако владината седница заврши без соопштение од „Илинденска“ дали ќе има предлог до претседателот на Македонија, Стево Пендаровски, за нејзино продолжување, иако доцна вечерта беа објавени низа други одлуки од Владата.

Доколку нема нов предлог до шефот на државата, тоа значи дека официјално по завршувањето датумски на 13 јуни е истечен рокот на последната одлука за вонредна состојба и предвремени парламентарни избори треба да има дефинитивно на 5 јули.

Претседатеот на СДСМ, Зоран Заев, вчера пред медиумите рече дека ќе побара од техничкиот премиер Оливер Спасовски и од останатите министри доцна синоќа на  предвидената седница да изгласаат предлог за продолжување на вонредната состојба за дополнителни три дена заради избори на 8 јуни и гласање в среда наместо недела.

Немаше никакво соопштение од кабинетот на Пендаровски, а немаше ниту информација за евентуална измена на Уредбата за изборите, според која гласањето би требало да се реализира 22 дена по завршувањето на вонредната состојба, што во случајов би значело на 5 јули, така што ДИК уште утре треба да усвои ревидиран роковник за спроведување на изборните дејствија.