Добивај вести на Viber
Нема бран на романски работници во Велика Британија. Само дваесетина Романци допатувале во оваа земја за да побараат работа од почетокот на годинава, откако се укина ограничувањето за вработување романски државјани.
Според романскиот амбасадор во Лондон Јон Јинга, во овој период од две недели, само десет британски фирми биле во контакт со Амбасадата, за да побараат ангажирање на работници од Романија. Јинга открива дека слична е состојбата и во Холандија, каде допатувале само 21 романски и 15 бугарски имигранти.
По влегувањето на Романија и Бугарија во ЕУ на 1 јануари 2007 година, девет земји од Унијата, меѓу кои Велика Британија и Холандија, воведоа привремени мерки за ограничување на приливот на странски работници од Источна Европа. Мерките имаа важност од седум години и истекоа на 1 јануари годинава.
Со овие мерки, романските и бугарските државјани не можеа да се врааботуваат во сите сектори на британската економија, туку само во аграрот и прехранбената индустрија, или можеа да престојуваат само со покана од определена британска фирма, или како самовработени.
Пред истекот на седумгодишната блокада, во британската јавност имаше серија реакции со барање важноста на забраната да се продолжи поради стравувањата од наплив на работна сила од овие две земји.