Рударите со оптимизам гледаат на 2014-та

Добивај вести на Viber

Македонските рудници ги очекува успешна 2014 година, очекува претседателот на Македонската асоцијација за рударство Николајчо Николов. Според него, на особено успешна година можат да се надеваат рудниците за метали затоа што на повидок е стабилизирање на цените на металите на светските берзи. „Ние имаме добри временски улсови и очекуваме 2014-та да биде на ниво на 2013-та, односно да биде успешна во сите делови на рударството, особено во металичните сировини“, изјави Николов, кој денеска се сретна со министерот за економија Ваљон Сарачини. Разговарале за подобрување на законските рамки со кои се уредува рударството и нивно приближување до европските стандарди. „Се работи на два нови закона за геологија кои ќе ги опфатат областите на деталните геолошки истражувања, и законот за рударство кој ќе го опфати делот на експлоатација на минерални суровини. Се формира нов Инспекторат за рударство, чија обврска ќе биде проверката на рудниците. Четвртата можеби најбитна работа е нова стратегија и нов правилник за мерките за заштита при работа“, појасни Сарачини. Во изготвувањето на новите прописи ќе се консултира искуството на Словенија, Чешка и Полска.