Русија ќе бара од Германија отштета од четири билиони евра

Добивај вести на Viber

Членовите на рускиот парламент подготвуваат работна група за процена на штетата која Германија и ја нанела на Русија во текот на Втората светска војна, речиси 70 години од завршувањето на судирите, пишува рускиот весник „Известија“.

Како што пренесува „Њузвик“, Русите ќе бараат од Германија отштета од четири билиони евра.

Според зборовите на пратениците на Либерално демократската партија на Русија Михаил Дегјатеров, иницијативата е директен одговор на трговските санкции кои САД и ЕУ и ги воведоа на Русија поради анексијата на Крим во март и поддршката на проруските сили во источна Украина.

Дегјатеров рекол дека Германија ништо не и платила на СССР за уништување во текот на Втората светска војна.

Според неговите зборови, СССР после конференцијата на Јалта вратил некој германски имот - воглавно ограбен мебел, облека и индустриска опрема како и некој воен плен, но „СССР не барал од Германија економска надокнада“.

Тој оценил дека „Германија продолжила да и нанесува економска штета на Русија, придржувајќи се до трговските санкции на ЕУ“, потсетувајќи на низа трговски ограничувања кои ЕУ и ги наметнала на Русија кои предизвикале криза во руската економија и пад на рубљата.

„Во текот на траењето на војната, 30 одсто од нашата земја и националното богатство е уништено, а уништени се 1710 големи советски градови и села, 32 000 од индустриската зона, а 100 000 фарми целосно се уништени“, рекол Дегјатеров, мислејќи на податоците кои одборот на Сталин ги собрал после војната.

Според неговите зборови, оваа материјална штета изнесува 600 милијарди долари и додал дека „Германија плаќа компензација за шест милиони жртви од Холокаустот, но игнорира 27 милиони убиени советски граѓани од кои 16 милиони се цивили“.

„Ако сето тоа се земе предвид, Германија не му должи ништо помалку од три до четири билиони евра на наследникот на Советскиот Сојуз - Русија“, смета Дегјатеров.