Добивај вести на Viber
Денеска во Богомила се одржа 7. Саем на здрава храна насловен „Поблиску до природата“. На него локалните земјоделци ги презентираат и продаваат земјоделските производи од регионот на Чашка- општина која сеуште важи за место во кое се произведува еколошки чиста и здрава храна.
На тезгите, земјоделците од регионот продаваа јајца, мед, грав и други земјоделски производи кои самите ги произведуваат. Истовремено се продаваа и веќе зготвени специјалитети специфични за овој регион и од продукти произведени во оваа општина.
Саемот на здрава храна „Поблиску до природата“ го организира општина Чашка, а како што изјави нејзиниот градоначалник, Горанчо Пановски , општината се труда ги поттикне земјоделците да произведуваат што поголеми количини на здрава храна.
Посетителите на Саемот имаа можностт да вкусат и локални специјалитети, а манифестацијата имаше и хуманитарен карактер. Парите собрани од продажбата им беа подарени на децата од дневниот центар за лица заболени со церебрална парализа „Детелина“ .
Саемот на здрава храна првпат се одржа во 2007 во селото Богомила , а потоа и во селата Извор, Теово, Согле, Богомила и Оморани.