Сакате работа во Гугл? Еве какви кандидати бараат!

Добивај вести на Viber

Компанијата Гугл е позната по неверојатно тешките и комплицирани прашања што им се поставуваа на кандидатите на интервјуата за вработување. Заради чудни прашања како „колку топчиња за голф собира во автобус“ или „колку бензински пумпи има на Менхетен“ Гугл стекна репутација на компанија која има исклучително високи стандарди за вработување. Сепак, неодамна компанијата се откажа од поставување на овие прашања и призна дека ваквите тестови за идните вработени немаат многу смисла. „Тие прашања се целосна загуба на времето“, изјавил за БизнисИнсајдер Ласло Бок од Гугл, кој признал дека врз основа на одговорите на вакви прашања не можат да се дознаат никакви корисни информации за кандидатите. Затоа наместо бесмислени прашања, Гугл сега користи „бихејвиорални интервјуа“ со кои сакаат да дознаат се за досегашното работно искуство на кандидатите. Така, на пример, ги распрашуваат за начините на кои решиле некои аналитички проблеми. На тој начин можат да добијат многу повеќе информации за потенцијалните вработени, да разберат како тие се однесувале во тешки и непредвидливи ситуации во кариерата и да дознаат кои задачи кандидатите ги сметаат за тешки. Исто така, оваа компанија се помалку вработува луѓе кои завршиле факултет, бидејќи проценува дека другите способности на кандидатот се поважни од дипломата - можност за учење, брзо решавање проблеми, извлекување заклучоци од наизглед неповрзани информации, лидерски способности. Притоа, Бок додава дека не бараат лидери како „претседател на шаховски клуб“, туку индивидуи што ќе знаат кога треба да водат проект, а кога да слушаат и да ги следат другите лидери. Она што е навистина интересно е дека оваа компанија никогаш не бара експерти во одредена област, затоа што смета дека тие наоѓаат решение за одреден проблем на ист начин на кој претходно милион пати биле решени слични проблеми, додека оние што не се експерти можат да згрешат, но често ќе дојдат до оригинален начин за решавање на проблемот што води кон иновации.