Само едно лице со решение за самоизолација по контакт со Оливер Спасовски
Објавено во: Македонија 28 Октомври, 2020
Ирена Бухова, директорката на Државниот санитарен и здравствен инспекторат, на денешната прес-конференција рече дека само едно лице кое било во контакт со министерот за внатрешни работи Оливер Спасовски добило решение за самоизолација.
- Издадено е едно решение по основ на контакти по спроведена епидемиолошка анкета дека само за едно лице постои среден, односно висок степен на загрозеност, рече Бухова.
Спасовски вчера рече дека е позитивен на Ковид-19 и дека веќе е во домашна самоизолација, по што се правеше анкета на неговите контакти во Владата и СДСМ.
„Почитувани, би сакал да ве информирам дека и покрај строгото почитување на мерките коишто ги превземам за моја лична и заштита на луѓето околу мене од почетокот на пандемијата, вечерва добив позитивен резултат за Ковид 19.
Клиничката слика ми е добра, со благи симптоми и веќе сум во домашна самоизолација. Чувајте се“, напиша министерот синоќа на Фејсбук.