СДСМ најави целосна ревизија на акцијата Ден на дрвото

Добивај вести на Viber

СДСМ во својот „План за живот во Македонија“, предвидува да направи комплетна ревизија на спроведување на акцијата „Ден на дрвото” од стручен и финансиски аспект.

Со ревизијата ќе се утврдува на кои површини се спроведуваше акцијата, колку средства се потрошени и колкав е ефектот од пошумувањето.

„Тука, на местото позади мене имаше парк којшто беше целосно уништен за да се изгради уште една нова барокна зграда. Како што слушнавме од „бомбите“, на Груевски постоечките згради му биле грди, па сакал да го разубави просторот. Не му било важно што ќе уништи уште едно парче од зеленилото на загаденото Скопје, не му било важно ниту дали ќе изгуби гласачи, бидејќи, како што слушнавме, сметал дека повеќето секако немало да гласаат за него, па не му биле важни. Така се однесуваат и Никола Груевски и Коце Трајановски, кон зеленилото и кон дрвјата во Скопје. Долга е листата на уништени паркови, исечени дрвореди низ Скопје“, рече Пеце Мирчевски, претседател на Комисијата за животна средина и просторно планирање на СДСМ.

Тој истовремено, потенцираше дека се трошат милионски суми за проектот „Ден на дрвото“ а тој не дава резултати. 

Појасни дека според „Македонски шуми“, досега биле платени повеќе од 64 милиони садници кои чинеле над 10 милиони евра, а на терен нема никакви резултати.