СДСМ тврди дека во расипано возило на Итна помош се превезувало бебе

Добивај вести на Viber

Набавените 69 возила на Итната медицинска помош, до кои се сликаше Никола Тодоров, немаат приклучок за инкубатор за бебиња, и затоа бебињата за кои е потребна итна интервенција се превезуваат со стари возила кои често се расипуваат, обвинија денеска од СДСМ.

„Откако завршија два човечки животи во возило на Итната медицинска помош кое што се расипа на патот од Крива Паланка кон скопските клиники, деновиве во ризик е доведен и живот на бебе! Според информациите што ги име од Охрид кон Скопје било превезувано бебе во старо возило на Итната медицинска помош, кое што се расипало на Стража. Поради тоа бебето на Стража било префрлено во друго возило на Итната помош. Во старо возило на Итната помош и завчера било пренесувано друго бебе, исто така од Охрид кон Скопје“ – изјави денеска на прес-конференција пратеничката во Собранието и претседател на комисијата за здравство на СДСМ, Јагода Шахпаска.

Таа вели дека ова е уште еден доказ за несовесните политики во здравството, кои, како што рече, мора да бидат спречени.

Од ВМРО-ДПМНЕ велат дека во времето на СДСМ немало никакви инвестиции во здравството, а во врска со обвинувањата за неисправните возила на итната медицинска помош, од партијата истакнуваат дека секое возило е опремено со централен систем за кислород, како и со приклучок за напојување каде можат да се поврзат сите медицински апарати, а дека посебен приклучок за инкубатори не постои, велат од ВМРО-ДПМНЕ.