Се поголема дискриминација кај огласите за вработување

Добивај вести на Viber

Кај над 60 отсто од  вкупно 300 огласи за вработување, објавени минатиот месец е забележана дискриминација, а во вкупно 48 случаи е направена дискриминација по неколку основи, покажува анализата од истражувањето на Комисијата за заштита од дискриминација, поврзано со праксата во земјава за објавување на огласи за вработување. Додека кај 178 огласи е забележана директна дискриминација од страна на работодавецот, а во 12 случаи истата е направена на индиректен начин. Во 162 огласи лице од одреден пол односно во 151 случај женско лице, додека само во 11 огласи е наведено дека тоа трева да биде машко лице. Во 64 случаи е наведена возраста како критериум за основање работен однос, додека во 20 огласи наведен е условот на испраќање лична фотографија. Претседателот на Комисијата, Душко Миновски,истакна дека целта на Комисијата, освен утврдување на фактите, е и давање препораки како да се промени состојбата. Истражувани се, како што истакна тој, неколку основи на дискриминација како пол, возраст, и личен и општествен статус, и тоа во 300 огласи објавени во април оваа година што биле објавени во неколку дневни весници, Огласник 24 часа и веб страниците Најди работа, Вработување и Моја кариера. -Од вкупно 64 огласи во кои е наведена возраста како критериум за вработување, во 23 огласи се бара тоа да биде младо девојче, во 13 огласи возраста на лицето да биде до 40 години, а во два до 50 годишна возраст, во три до 30 годишна возраст, во два до 25 години, во два над 25 години, во еден до 45 годишна возраст, а во по еден оглас лицето треба да е младо момче и да биде постаро лице“, рече Миновски, додавајќи дека во 20 огласи од вкупно собраните наведен е условот на испраќање на лична фотографија во прилог на апликацијата за вработување. -Испраќањето на лична фотографија во прилог на апликацијата треба да биде избор на барателот за работа, додека физичките карактеристики на кое било лице не треба да бидат услов за вработување“, додава тој. Она што се нотира во оваа анализа е тоа што кај голем број огласи не се наведува работодавецот, односно околу 80 отсто од огласите се од приватниот сектор, но, како што вели Миновски, мора да се земе предвид дека поради изборите немаше огласи за вработување во администрацијата. Во препораките и заклучоците, што ќе бидат доставени до Владата, се предлага воспоставување систем за контрола, мониторинг и евалуација во областа на работата и работните односи во процесот на барање работа, објавувањето на огласи за вработување со недискриминациони елементи, обука на новинарите, промовирање на Кодекс на однесување на работодавците, обука и стратегија за професионално работење, и да се промовира начинот на правилно објавување на огласи за вработување и критериумите за вработување. Анализата од извештајот ќе се достави и до организациите директно инволвирани во процесот на објавување огласи како Стопанската комора, Агенција за претприемништво, Агенцијата за времено вработување, Здружението на работодавачи, Агенцијата за вработување и други.