СЕ ЗАКАЖУВА НА VAKSAJNS.MK: Упад во сајот на МЗ за регистрација за вакцинација

Добивај вести на Viber

Граѓаните од синоќа збунети побарале одговори во Министерството за здравство во однос на тоа на која страница може да се регистрираат, односно да искажат интерес за претстојната вакцинација против Ковид-19, откако се појави креиран сајт: vaksajns.mk

Од Министерството за здравство за Фактор потенцираат дека станува збор за упад на официјалната страница на министерството и посочуваат дека случајот е пријавен во МВР во Секторот за компјутерски криминал.

-Единствената веб страница на која граѓаните преку пополнување на апликација искажуваат интерес за вакцинација против Ковид-19 е www.vakcinacija.mk. Страницата која ја посочувате утринава е пријавена во Министерството за внатрешни работи и не е веб страница зад која стои Министерството за здравство ниту пак Националните систем МојТермин, велат од Министерството за здравство.

Истовремено посочуваат дека добиле пријави уште во текот на вчерашниот ден, односно по завршување на работното време од граѓани кои се обидувале да направат електорнско пријавување.

Инаку, Фактор од свои извори дознава дека страницата vaksajns.mk е креирана од лице кое е одличен познавач на компјутерската технологија.

Во меѓувреме, од почетокот на фунционирањето на официјалната страница www.vakcinacija.mk, односно од вчера до денеска се пријавиле повеќе од 20.000 граѓани кои искажуваат интерес за вакцинацијата против Ковид-19.