Се засилува борбата против пиратскиот софтвер – казни до 9 илјади евра

Добивај вести на Viber

Од 100.000 до 550.000 денари казни за надомест на штета треба да платат компаниите за кои ќе се открие дека употребувале нелиценциран „пиратски“ софтвер. Освен ова, на казнетите компании им се одзема и опремата, а одговорните лица се соочуваат со дополнителни парични или условени затворски казни. Според претседателот на Координативното тело за интелектуална сопственост Мите Костов, судовите веќе започнале да ги носат првите пресуди за компаниите кои неовластено користеле софтверски производи. „Особено радува фактот што надлежните судови во Република Македонија, постапуваат по нашите пријави против сторителите на казниви дела и сега дојдовме и до судски завршници и високи казни за оние кои не го почитуваат законот“, изјави Костов. Надлежните предупредуваат дека нелегалниот софтвер претставува огромен ризик за потрошувачите, но и за економијата. Фалсификуваните копии ги изложуваат корисниците на вируси кои можат брзо да заразат цели мрежи и заедници, а т.н. „злонамерни“ софтвери да ги загрозат приватните податоци и да доведат до кражба на идентитет. Софтверската пиратерија предизвикува и намалување на даноците и губење на работните места, делува дестимулативно на инвестициите, и генерално има длабоки негативни импликации за милиони луѓе низ целиот свет.