Шилегов: Прислушкувам повеќе и од Мијалков

Добивај вести на Viber

Градоначалникот Петре Шилегов си дал критика сам на себе на комичен начин на синоќешната „Скопска прес дружба“, која ја организираше градската управа, а меѓу другото го спомена и Сашо Мијалков, поранешниот директор на УБК, кој неодамна беше исклучен од ВМРО-ДПМНЕ поради тоа што, според партиското раководство, врбувал опозициски пратеници да гласаат за уставните измени.

Шолегов рече дека добро му е познат муабетот дека „градоначалникот ништо не работи“ на едногодишнината од неговото стапување на градоначалничката функција.

„Јас слушам повеќе и од Мијалков. Имам 3.000 легални такси превозници и не знам колку диви таксисти. 3.000 жолти комбиња на улиците и слушам сè. Во изминатава година главните скандали во мојата работа беа комарците, кучињата скитници и буквите од пораката на Тито за земјотресот. Се зборуваше зошто не сме ги поставени оригиналните букви, а не знаете дека новиве ги изработивме од стопениот споменик на Ќосето“, рече Шилегов во својот сатиричен говор пред новинари, водители, министри, градоначалници и директори на јавни претпријатија.

Тој кажа дека оваа година Скопје добил нов, поинаков концепт и дека граѓаните наутро се буделе без страв дали во Скопје ќе биде поставен нов споменик или ќе почне да се гради нова барокна фасада или зграда.