Што му ветил Мицкоски на Иво Вајгл?
Објавено во: Македонија 05 Февруари, 2019
Лидерот на ВМРО-ДПМНЕ, Христијан Мицкоски ветил дека ќе бидат конструктивни за реформите кои Македонија треба да ги направи.
Известувачот за Македонија во Европскиот парламент, Иво Вајгл по средбата со Мицкоски, за МИА изјави дека добил уверување дека опозицијата ќе биде конструктивна за реформите потребни за ЕУ, јави дописничката на МИА од Брисел.
Вајгл потенцирал дека главен интерес на Европскиот парламент е да продолжи земјата по патот кон ЕУ и Унијата да го одржи ветувањето да почнат преговорите во јуни.
„Мицкоски рече дека ВМРО ќе соработува со владата за реформите и законодавството врзано за членството во ЕУ и дека ќе биде партнер од доверба“, изјавил Вајгл.
Мицкоски ги повторил критиките на неговата партија кон Преспанскиот договор, но Вајгл не верува дека ВМРО-ДПМНЕ би ја довел спогодбата во опасност ако дојде на власт.
Состојбата во Грција според Вајгл е покритична, иако тој се надева дека сите се свесни за важноста на Договорот од Преспа.
Мицкоски изразил загриженост за претстојните претседателски избори и побарал да биде обезбедено силно присуство на странски набљудувачи, соопшти Вајгл.