Што пишуваат грчките медиуми за средбата во Охрид?
Објавено во: Македонија, Балкан 13 Април, 2018
За вчерашната средба на министрите за надворешни работи, Никола Димитров и Никос Коѕијас во Охрид грчките медиуми ја пренесуваат изјавата на шефот на грчката дипломатија дека се направени чекори напред и дека уште остануваат отворени тешките прашања.
Тие пишуваат и за изјавата на македонскиот министер Димитров дека е разговарано и за временскиот рок за имплементирање на евентуалниот договор.
Медиумите во Грција пишуваат и дека и натаму остануваат отворени прашањата-ерга омнес употребата на името, Уставот и националноста, додека, пак, договор е постигнат за заштита на границите, заеднички активности во иднината, билатералната соработка и иредентизмот, пренесува дописникот на МИА од Атина.
„Без големиот чекор од скопската страна завршија разговорите на Коѕијас и Димитров во Охрид, но процесот продолжува со договор за одредени аспекти на името, а остануваат разликите“- објави грчката државна телевизија ЕРТ.
ТВ Антена коментира дека прашањата поврзани со Уставот и севкупната употреба на сложеното име „остануваат на теренот на Скопје“.
Во централните изданија на вестите на грчките телевизии, средбата во Охрид овој пат не беше главна тема поради тоа што од вчера прва вест во Грција е падот на воениот хеликоптер во Егејското море и загинатиот пилот. Но, сепак, новинарите детално и темелно известија за новата рунда разговори на шефовите на двете дипломатии.