Сите скопските семафори ќе се регулираат од едно место

Добивај вести на Viber

Се прави новиот центар за сообраќај во Град Скопје. Во текот на ова лето се очекува од Центарот да почне да се регулира работата на 30 крстосници, а до крајот на годинава да се поврзат 90 крстосници.

„За таа цел, на околу 90 крстосници во коловозот ќе бидат инсталирани детекторски индуктивни јамки, кои ќе бројат и детектираат возила, ќе бидат поставени 50 камери преку кои ќе се врши визуелен мониторинг на сообраќајните текови и ќе бидат инсталирани 47 нови семафорски контролери. За меѓусебно поврзување на крстосниците, како и нивно поврзување со Центарот за управување и контрола на сообраќајот е предвидена оптичка мрежа која треба да овозможи пренос на податоците до Центарот и обратно. Со формирањето на Центарот предвидено е воведување на адаптивна контрола на сообраќајот на околу 90 крстосници. Тоа значи дека во иднина, светлосните сигнали на овие крстосници ќе работат во зависност од сообраќајното оптоварување, односно зеленото време нема да биде фиксно како што е денес, туку ќе биде променливо во зависност од бројот на возила кои поминале преку детекторските индуктивни јамки“, изјави градоначалникот на Скопје Коце Трајановски.

Проектот е финансиран со заем од Европската банка за обнова и развој во износ од 2,6 милиони евра. Изведувач на работите е СВАРКО СИСТЕМС од Германија со подизведувачот ЕЛКОМ КОНСТРАКШН од Скопје.