СИТЕ СМЕ ТЕШКО ПОГОДЕНИ ОД СМРТТА НА МЛАДИТЕ ПАЦИЕНТИ: 38-годишниот немал никакви претходни заболувања, детално од Клиничка болница Штип за Фактор

Добивај вести на Viber

Во Клиничката болница-Штип, односно во тамошниот ковид-центар починаа двајца млади пациенти. 35-годишниот е од Берово, а 38-годишниот е од Штип, соопштија за Фактор, портпаролката Марина Шуманска, како и лекарите од Инфективното одделение во Клиничката болница во Штип. Велат дека сите во болницата се многу тешко погодени од смртта на младите пациенти и дека направиле максимални напори да им ги спасат животите.

-35-годишниот пациент од Берово е целосно вакциниран уште во август со Синовак. Кај нас е примен на 4.ноември, а позитивен на вирусот е од 1.ноември. Донесен е во исклучитлно тешка состојба, со многу отежнато дишење, односно со многу ниска сатурација. Пациентот беше со даунов синдром и имаше прекумерна тежина, обезитас, што го става во категоријата ранливи  пациенти. Другиот млад човек кој не се извори со болеста е нашиот 38-годишниот сограѓанин, кој немаше претходни коморбидитети и кој исто така беше целосно вакциниран од август со Синовак. Примен е на 28.октомври, и неговата состојба се подобруваше, но за жал вчера оддеднаш настанаа компликации, пациентот направи пулмонална тромбемболија, велат за Фактор од Инфективното одделение во Клиничката болница-Штип.

Инаку, во моментов таму од ковид се лекуваат 54 пациенти, од кои 48 се на кислородна поддршка, како и 9 пациенти кои се сместени на Кожното одделедние.

-Во Штипскиот Ковид-центар има уште неколку болнички кревети, а само во текот на вчерашниот ден се направени 24 амбулантски прегледи. Апелираме на помасовна вакцинација, бидејќи само така нема да остане простор за вирусот да се шири и понатаму и да прави уште поагресивни мутации, соопшти Шуманска за Фактор.

Анита Буховски