Сите тутунари ќе склучат договори за откуп, ама на помали количини тутун

Добивај вести на Viber

Вицепремиерот и министерот за финансии Зоран Ставрески на тутунарите денеска им вети решение за нивниот проблем со откупот за следната реколта. Владата смета дека има решение со кое ќе се амортизира ударот од одлуката на откупните претпријатија да го намалат за речиси 40% откупот од следната реколта. „Најдовме едно оптимално решение со кое што решаваме повеќе проблеми во исто време. Прво се договоривме секој тутунопроизводител кој што во 2013-та година имал склучен договор за откуп на тутун да има договор за откуп за тутун и за 2014-та година. Ниту еден тутунопроизводител да не остане без склучен договор. Второ, се договоривме пропорционално да се изврши усогласувањето на количините, при што ги заштитивме тутунопроизводителите кои што го произведуваат тутунот од егзистенцијални причини“, појасни Ставрески, кој денеска се сретна и со тутунарите и со откупувачите. Бил постигнат договор тутунарите да се поделат во неколку групи во зависност од произведеното количество во 2013 година и сразмерно на тоа да се врши намалувањето на откупот за следната година. „Првата група се производители до 500 килограми и тука имаме 10.726 лица и за нив се договоривме за 2014-та година да немаат никакво намалување на количината. Значи овие 10.726 лица ќе склучат исти договори како што имале за 2013-та година. Слично е и со втората група во која што произведуваат од 501 до 1.000 килограми, тоа се 13.803 лица, за нив ќе има само петпроцентно намалување во однос на количините од 2013-та година“, појасни Ставрески. Во следните категории на поголеми производители ќе има и соодветна поголема количина за намалување. Проблемот за откупот на тутунот се јави заради намалената побарувачка за тутун во светски рамки, особено за тутунот од ориенталната сорта која најмногу се одгледува во Македонија.