СЈО добило над 300 барања за проверка на прислушувани телефони
Објавено во: Македонија 26 Декември, 2016
Над 300 барања за проверка на телефонски броеви дали биле таргет на прислушувањето пристигнале до Специјалното јавно обвинителство(СЈО), објави 24 Вести.
Според СЈО, 292 барања се обработени и веќе се дел од предметот „Таргет“ додека останатите барања сè уште се обработуваат.
Од СЈО информираат дека лицата за кои ќе се утврди дека користеле телефонски броеви кои биле предмет на незаконско следење на комуникациите, како и лицата за кои ќе се утврди дека биле соговорник на незаконски следен телефонски број ќе бидат повикани во својство на оштетени лица.
Барање до СЈО може да поднесе секое заинтересирано лице, кое ќе треба го наведе телефонскиот број или телефонските броеви за кои се сомнева дека биле предмет на незаконско следење на комуникациите.