СЈО ОБВИНУВА: Судот не сака да издава наредби за претрес кај високи и екс функционери

Добивај вести на Viber

Уште на самиот старт кога почна со дејствување, институцијата која се формираше согласно договорот од Пржино, специјалното јавно обвинителство се соочува со сопки.

Денеска од обвинителството кое е под закрила на специјалната јавна обвинителка Катица Јанева стигна соопштение до јавноста со кое тимот на СЈО го обвинува судот за отежната соработка.

Од соопштението произлегува дека Основниот суд Скопје 1 одбивал да издаде одобренија за претреси кај екс и високи функционери.

„Од страна на судот беше издадена само една наредба за претрес и тоа на ден 25.01.2016 година, при што од наша страна извршен е претрес на една локација во Скопје, за потребите на истражната постапка во предметот под работен наслов „Титаник“.

Сите останати барања за издавање на наредби за претрес, кои се однесуваа на сегашни и поранешни високи функционери, се одбиени. Имено, судиите за претходна постапка на кои им биле доделени овие предмети и тоа судијата Елена Јосифовиќ и судијата Александра Поп Стефанија изразиле несогласност по барањата за определување наредба за претрес, а кривичните совети во состав од судиите Љубинка Башеска, Горан Бошевски и Владимир Панчевски, од судиите Владимир Панчевски, Ленка Давиткова и Диана Груевска Илиевска и од судиите Ленка Давиткова, Диана Груевска Илиевска и Ивица Стефановски ги уважиле изразените несогласности на судиите за претходна постапка“, соопштуваат од СЈО.

Имајќи предвид дека СЈО покрена неколку постапки за функционери од владеачката партија, извесно е дека Судот одбива да одобри претреси кај функционерите на ВМРО-ДПМНЕ.