Скопјани ќе ја дочекаат Новата 2014 со македонски музички ѕвезди

Добивај вести на Viber

Град Скопје и оваа година, со поддршка на Македонски телеком, Т-Мобиле Македонија, ја организира традиционалната новогодишна прослава на плоштадот „Македонија“, најавија денеска дел од организаторите и учесници во новогодишната забава за пречек на Новата 2014 година. - Би сакал да им посочам на граѓаните на Скопје, дека и оваа година Град Скопје во соработка со Македонски Телеком и Т-Мобиле, ќе ја организира новогодишната забава, за дочек на Новата 2014. Можам да истакнам дека и годинава градскиот плоштад ќе биде местото за добра забава на новогодишната ноќ, токму затоа би ги поканил сите граѓани, да дојдат и заедно да ја прослават Новата 2014 година, рече градоначалникот на Град Скопје, Коце Трајановски. Во највеселата ноќ, граѓаните ќе се забавуваат со музиката на македонските, но и интернационални ѕвезди, како младиот, но реномиран музички уметник и интерпретатор на народни и забавни нумери, Мустафа Имери, па потоа журка со песните на Тијана Дапчевиќ, па мини концерт на македонската дива Калиопи, за на крајот да настапи нашето познато реобединето музичко дуо Роберт и Панки или попознати како „Куку-леле“. Новогодишниот концерт, ќе почне во 21 часот, а се очекува да трае до раните утрински часови. Вистинската кулминација ќе се случи точно на полноќ кога небото над Скопје, ќе го осветли спектакуларен огномет.