Скопје рекордер во изградба на станови

Добивај вести на Viber

Факт и реалност а сега и официјално докажано дека најмногу се гради во Скопскиот регион. Само во општина Аеродром лани се завршени 767 станбени единици со корисна површина од 43.614 метри квадратни.

Податоците на државниот завод за статистика покажуваат дека лани деловните субјекти  извршиле градежни работи во вредност од 24 909 016 илјади денари, од кои 8 672 866 илјади денари припаѓаат на објекти во индивидуална сопственост.

Во 2014 се изградени вкупно  1 734 објекти, а завршени се вкупно 1 772 станови со вкупна површина од 122 332 м², од коишто 1 446 се во индивидуална сопственост.

Податоците уште покажуваат дека после Скопје, најмногу завршени единици има во Струмица и Охрид, а во поглед на  завршени домови градени во индивидуална режија, најмногу се градело во Гостивар втора на листата е скопската општина Центар, а после неа следи Илинден.

Просечната корисна површина на завршените станови е 99,3 метри квадратни.

Можен ли е пораст на цената на становите?

Мал раст на цените на становите регистрираше Народната банка овој месец.

Според податоците на оваа институција има раст на цените за два отсто на годишно, односно за 1,5 отсто на квартално ниво.

Сепак, и од НБМ велат дека најверојатно трендот е од привремен карактер.

Имено нема позначајни разлики во понудата и побарувачката на станови.

Бизнисмените и експертите сметаат дека станува збор за размрдување на пазарот на недвижности предизвикано и од проектот „Купи куќа, купи стан“.

Цените на становите во Скопје и низ Македонија минатите три години имаа забележителен пад, за минимум 100 -200 евра од м2, во зависност од локацијата. Сега во Центар стан се купува и за 1100 евра по м2, во Карпош и Аеродром за 800 – 1000 евра по м2.