Скопје вечерва во магла, Тетово и Кичево со алармантно загадување на воздухот

Добивај вести на Viber

Во тешка магла вечерва е обвиено Скопје. Дел од граѓаните носат маски, загадувањето е видливо и со голо око, а се чувствува и при дишењето. Освен во Гази Баба, алармантно ниво вечерва покажуваат речиси сите мерни станици на Министерството за животна средина во Скопје, Тетово и Кичево. Граѓаните се загрижени за здравјето. Според владините препораки бремените жени и старите лица денеска не требаше да одат на работа, а сите останати граѓани во загадените зони надлежните препорачаа да избегнуваат движење на отворено. Загадувањето беше тема и на денешната седница на Град Скопје, кога опозициските советници побараа да биде ставена како  прва точка на дневен, но мнозинството ја помести да биде 26-та на ред. Опозицијата обвини дека мерките за справување со загадувањето од Владата се најдобра потврда дека кај власта не постои политичка волја за решавање на овој сериозен проблем. Невладините здруженија најавија протест во сабота и апелираа граѓаните да се откажат од автомобилите. Метеоролозите пак велат дека не се очекува промена на временските услови, што значи дека деновиве нема да има намалување на загадувањето.