СЛОВЕНИЈА: Јанез Јанша останува во затвор!

Добивај вести на Viber

Врховниот суд на Словенија го одби барањето за утврдување на законитоста на случајот „Патриа“, за кој поранешниот словенечки премиер Јанез Јанша веќе издржува затворска казна. Ова практично значи дека е потврдена правосилната пресуда на Вишиот суд со која Јанша беше осуден на две години затвор, а двајца негови соработници добија затворски казни од по 22 месеци. Во пресудата Врховниот суд ги одби тврдењата на бранителите на Јанша и утврди дека првостепениот и второстепениот суд не го прекршиле кривичниот законик и не направиле прекршување на кривичната постапка. Осудените сега правда можат да бараат пред Европскиот суд за човекови права, доколку сметаат дека им се прекршени основните права и човекови слободи. Сите тројца тврдат дека не се виновни и дека процесот против нив е политички мотивиран. Во аферата „Патриа“ Јанша е осуден за кривични дела поврзани со примање поткуп за незаконско посредување при набавка на оклопни возила од Финска.