Со монографија за Македонија до повеќе туристи

Добивај вести на Viber

Македонските граѓани и туристите добија уште една можност да се запознаат со туристичките потенцијали и културно-историските знаменитости во земјава преку новата  монографија насловена,„Македонија – туристички бисер“.  Изданието е отпечатено во 3.000 примероци на македонски и на англиски јазик, има 592 страници и во неа се претставени повеќе од 350 места за посета со над 1.700 фотографии, како и 12 карти.

Во изданието се опфатени 34 градови, 19 населени места, осум плоштади и чаршии, седум саат-кули, шест мостови, 35 споменици, 20 музеи, 10 спомен-куќи и галерии, 31 црква, 32 манастира, пет џамии, шест објекти на исламската архитектура, 15 археолошки локалитети, 15 планини и врвови, седум извори и реки, три национални паркови, три природни езера, еден остров, осум вештачки езера, четири бањи, три пештери, девет експонати и сувенири, 39 културни манифестации кои се одржуваат на традиционална основа, а презентирани се и над 350 сместувачки и угостителски капацитети, туроператори итн. „Македонија - туристички бисер“ е комплексно дело кое напорно, но трудољубиво се работеше повеќе од две години - со многу љубов и ентузијазам, но и со должна темелност и посветеност кон основната идеја- да се опфатат сите важни туристичко-географски аспекти за целата територија на Република Македонија, разработувајќи ги нејзините туристички вредности низ десет туристички региони одделно. Мото на ова издание е „Македонија - полна со живот“, истакна Дејан Николовски, еден од авторите на текстовите во ова издание. Монографијата, посочи министерката за култура Елизабета Канческа-Милевска, е еден крупен чекор во промоцијата на сите природни убавини, на сите историски и културни обележја на нашата држава. „Публикацијата ги презентира и новите архитектонски дела кои го градат имиџот на нашата модерна метропола, кои се изградија во изминатиот период и кои се провокација многу туристи од разни држави да го посетат нашиот главен град. Композициите од текст, мапи и фотоилустрации застапени во монографијата ги нудат основните географски и историски карактеристики на Македонија и на нејзините 10 туристички региони“, рече Канческа Милевска. Монографијата е во издание на Информативно-деловен бизнис центар“-Скопје, а  поддржана е од Министерството за култура во рамки на Годишната програма за остварување на националниот интерес во културата за 2013.