Со нова опрема и објекти, Македонија ќе развива здравствен туризам

Добивај вести на Viber

Подобрувањето на условите во здравствените установи, нова медицинска опрема и реконструкцијата на здравствените објекти се главните цели кон кои треба да се стреми Македонија за развој на здравствениот туризам е заклучокот од Првата конференција за развој на здравствениот туризам на Република Македонија, а како  дел од националната стратегија за развој и промоција на овој вид туризам во за периодот 2012-2018 година. „Вредноста на проектите во здравството е 100 милиони евра, а со тоа здравствените установи ќе ги пружат сите услови неопходни за привлекување на домашни и странски пациенти“, истакна министерот за здравство, Никола Тодоров. Поддршка на ресорниот министер му дадоа и Министерот за економија Ваљон Сараќини , како и Министерот за транспорт и врски Миле Јанакиески. Според министерот за транспорт и врски Миле Јанакиески, континуирано се работи на подобрување на инфраструктурата, а со модернизацијата на аеродромите, Македонија станува поатрактивна земја за секој вид туризам. „Во рамките на нашите надлежности со градежното земјиште имаме и активности кои се со цел изградба на нови објекти, во тек е подготовка на нови локации за изградба на бањи во Кратово, Пробиштип, Виница, Штип, Струмица и Дебар кои дополнително би придонеле за зголемување на понудата за здравствен туризам“, изјави Јанакиески. Сараќини пак потенцираше дека  последниве 2 години постигнат е најголемиот порасти во туризмот во изминатава декада, вкупниот број на туристи во лани е зголемен за 10,5 %, додека ноќевањата забележаа пораст од 7,6%.  Бројот на странските туристи пораснал над 25%, а ноќевањата на 35,1%. За Директорот на Агенцијата за поддршка и промоција на туризмот Јордан Трајков, со промовирањето на Македонија во светот, ќе се промовира и здравствениот туризам, со што, додава тој, директно ќе влијаеме на зголемувањето на девизниот прилив, јакнењето на јавните и приватните здравствени институции, намалување на невработеноста и подобра позиција за компаниите кои работат во областа на туризмот.