Собраниска расправа за Законот за градежно земјиште

Добивај вести на Viber

  Пратениците расправаа за Предлог-законот за изменување и дополнување на Законот за градежно земјиште во второ читање, а како продолжение на 45-та седница. Според заменик министерот за транспорт и врски Тахир Хани, со предложените измени  на овој закон се уредува процесот за откуп на државно градежно земјиште по пат на непосредна спогодба, а се дава рок за изградба само во случаите кога земјиштето се продава по пат на јавно надавање. Непочитувањето на рокот за добивање на одобрение за градење не е услов за раскинување на договорот за отуѓување на земјиштето, а за непочитување на оваа обврска се плаќа казна, додека средствата од наплатата на договорната казна треба да бидат 80% приход за општините и 20% буџетот на државата. Со измените се предвидува и електронското јавно наддавање да трае неограничено, се додека има понуди постапката да се продолжува, неограничено се додека во временски интервал од две минути има нова понуда, наместо како до сега, три пати по две минути. За опозицијата овие измени се на штета на општините, а  според нив, една од причините е што рокот на градба се продолжува бескрајно долго што им овозможува на сите заинтересирани да ги земат парите од овие објекти. За владејачкото мнозинство пак, предложените измени не се против граѓаните и општините, посочувајќи дека на 39 општини им е доделено да управуваат со државното неизградено земјиште. Пратеникот Јани Макрадули од СДСМ рече дека нема да го поддржат законот, бидејќи е против општините и граѓаните и треба да легалзиира серија криминални објекти. Славе Гошев од ВМРО-ДПМНЕ пак истакна дека дел од забелешките на опозицијата биле прифатени од мнозинството и дека сите спорни околности околу јавното наддавање биле избришани. Изет Зеќири од Национална демократска преродба забележа дека со предлог-законот се отежнува процесот на децентрализација во делот на туристичките зони и автокамповите. Поради немање кворум и денеска не се гласаше предлог-законот за изменување на Законот за судовите, а беа донесени дополнителниот предлог-закон за граѓанска одговорност за навреда и клевета и предлог-законот за странска информативна дејност во Република Македонија.