Сонцето го „исуши“ квалитетот на земјоделските култури во Пелагонија

Добивај вести на Viber

Континуираните високи дневни температури го намалија квалитетот на земјоделските култури од годинешната реколта чија берба е во полн ек, оценуваат агроекспертите од битолскиот дел на Пелагонија. - Паралелно со бербата на земјоделските производи, се одвива и откупот, но за жал сушата го направи своето и го намали квалитетот, иако на пролет објективно очекувавме поголем квалитет посебно на пченицата и на тутунот во Пелагонија - изјави Илија Србиновски, раководител на подрачната единица на Министерството за земјоделство, шумарство и водостопанство со седиште во Битола. Тој додаде дека годинава во битолскиот дел на Пелагонија собрани се околу 60.000 тони пченица, но со послаб квалитет наспроти ланскиот. Досега се откупени околу 70 отсто од вкупните количини лебно зрно, но откупот на произведеното продолжува. Србиновски потенцира дека ова лето е регистриран и послаб квалитет на тутунот и затоа од засадените површини ќе бидат собрани околу 2.500 тони тутун. Во битолскиот дел на Пелагонија во овој период од годината се врши собирање на фуражните, силажните и градинарските производи, индустриска пиперка и моркови, а на почетокот од идниот месец ќе почне бербата и откупот на доматите, информираат од подрачната единица на МЗШВ.