Сопругот на Јанкулоска и се закани на Кацарска „за малтретирањето“ во деветиот месец од бременоста

Добивај вести на Viber

Влатко Илиевски, сопругот на Гордана Јанкулоска, и се закани на судијката Добрила Кацарска дека ќе ја пријави во Европскиот суд за човекови права затоа што ја малтретирала поранешната министерка за внатрешни работи со бројни закажувања на судски рочишта за случајот „Тенк“ кога таа била пред деветиот месец од бременоста.

Илиевски застапувајќи ја Јанкулоска како нејзин адвокат на комисиското сослушување денеска во Судскиот совет побара да биде разрешена судијката Кацарска и дека ќе ја пријави за пристрасност во Стразбур.

„Само да напоменам, Европскиот суд за човекови слободи и права има методологија да утврди пристрасност во водењето на постапката, користејќи објективен и субјективен тест“, наведе Илиевски, кој бара разрешување на Кацарска поради наводна намерна повреда на правичност на судењето и за груба повреда на судискиот кодекс.

Јанкулоска е осудена на четити години затворска казна за незаконската набавка на мерцедесот од 600.000 евра, но нема да оди в затвор додека не одлучи највисокиот суд по нејзините жалби за пресудата и за начинот на водењето на судскиот процес.

Одбраната на Јанкулоска на рочиштето пред повеќе од 15 месеци образложи дека таа се наоѓа во болница за што била доставена и медицинска документација како потврда на патолошката бременост.

Согласно документацијата што ја имала Кацарска на увид, Јанкулоска веќе влегува во деветтиот месец од бременоста, па според тоа, не требало да доаѓа во судот во период меѓу 38 и 42 недела, односно две недели по крајниот термин за пораѓање.